Dietrich von Bern
Us der alemannische Wikipedia, der freie Dialäkt-Enzyklopedy
De Dietrich vo Bern, au bekannt als Theoderich der Grosse, in Rom als Flavius Theodoricus, Gotisch Þiudareiks (454-526), isch en Herrscher vo de Oschtgote gsii. Er isch in Konstantinopel uufgwachse, und hät, beufträit vom Zenon, em Kaiser vo Byzanz, ab 488 Italie-n-eroberet. Er hät zeersch Verona erobered und deet es Schloss pouet. De Odoaker hät müese-n-uf Ravenna flüchte. De Dietrich hät dänn hät zwei Jaar lang Ravenna belageret, und hädnach de Rabeschlacht vo 493 en Vergliich mitem Odoaker uusghandlet, hät dee aber bimene "Versöönigsmahl" äigehändig ttöödt, und sich zum König vo ganz Italie uufgschwunge, und hät vo deetenaa in Ravenna residiert. Als Verträter vom Amalrich, sim unmündige-n-Änkel, isch er ab 511 au Herrscher vo de Weschtgote gsii.
Nach der Eroberig vo Italie sind d'Franke underem Chlodwig I die wichtigschte Gägner vo de Oschtgote gsii. Nachem Tod vom Dietrich 526 isch mit den Oschtgoten abwärts ggange: Abem 535i hät de Justitian I ires Gebiet erobere laa, und im 553i, nach de Niderlaag vom Teia gäge de Eunuche-General Narses bi de Schlacht vo Mons Lactarius isch s'Oschtgooteriich am Änd gsii (aaschlüüsend händ d'Langobarde in Norditalie regiert, bis si im 773i vom Karl em Grosse besiigt worde sind).
Sin traditionelle Name "vo Bern" chunt wahrschinlich vo Verona, also am Dietrich sinere Residänz vo 490 bis 493. Under dem Name tauchter dänn au als legendäri Figur ide Hochmittelalterliche Literatur uuf, zum Biischpiil im Nibelungelied. Daser "vo Bern" und nöd "vo Ravenna" gnännt wird, hät demit ztue, das vor alem d'Rabeschlacht grosse Iidruck uf d'Ziitgenosse gmacht hät, und zu dem Ziitpunkt isch de Dietrich ja würkli au no "vo Verona" choo.
