Buidhauarei

Aus Wikipedia

Der Artikl is im Dialekt „Südostobaboarisch“ gschriem worn.

D' Buidhauarei is oa Teil vo da buidndn Kunst. Dodamid san olle Kunstwerk gmoant, de wo dreidimensional san. Des hoasst, oiss wos koa g'moits Buidl auf am flachn Stickl Papia, Hoiz, Stoff oda Wand is.

Genaua gsogt ghern aa de Reliefs zu da Buidhauarei, weil de aa scho nimma ganz flach san und ned mid Pinsl und Farb, sondan mid de untnstehadn Methodn hergsteit wern. Zua zeitgnössischn Buidhauarei rechnt ma aa oft Installationen dazua, de se auf ganze Zimma oda Heisa dastreckn kennan.

A wichtiga Teil vo da Buidhauarei spuit se im effntlichn Raum o, grod wenns um Kunst am Bau, Brunna oda sowos geht.

Inhaltsverzeichnis 1 Gschicht 2 Buidhauarei im boarischn Raum 3 Matrial 4 B'arbatungsmethodn 4.1 Additive Methodn 4.2 Subtraktive Methodn

[dro wärkln] Gschicht

Buidhauarische Arbatn gebts scho seits Menschn gebt, ogfanga mit erste Schnitzarbatn in Horn oda kuitische Stickln aus Stoa wia de Venus vo Willendoaf. Vo de oidn Egipta san uns teilweis gigantische Skuipturn dahoitn, in dem tipisch steifn, monumental simmetrischn Stil vo dera Zeit.

Bei de oidn Griechn werds dann scho a wengal lebendiga, vor oim im Hellenismus, wo se ollawei meara Draperien und dramatische Gestn an de Stoafigurn zoang. De Remma hom dann recht vui vo de griechischn Sachn mehr oda weniga guat kopiert, wann aa de Etruska a recht intressante eigne buidhauarische Tradition ghabt ham.

Mit dem Christntum san dann de meistn Kinstla vo da Kirch zoid worn, und es san in Eiropa haffaweis Kirchn gschmickt worn mit Reliefs, Altäre und Heilignfigurn. Des is ganga vo da Romanik und da Gotik iba'n Barock und Rokkoko bis in de Neizeit. Spadestns in da Zeit vom Rodin ham se de Kinstla oba aa wieda mit andre Themen ausanandagsetzt, und dodamit an Weg zua modernan Kunst eigschlogn.

Neba dera westeiropeisch zentriertn Sicht muas ma aa dro erinnan, dass auf andre Kontinente genauso buidhauarische Arbatn entstandn san. De Ureinwohna vo Nord-, Mittl- und Südamerika ham ihr ganz eigne Stile ghabt, de se jetz no auf de zeitgenössische Kunst in dene Landa auswirkn. Genauso in Afrika, Asien, Australien, Neiseeland. Oft is sogar aso, dass se de eiropeischn Kinstla vo de Arbatn aus fremde Kuiturn inspiriern lossn.

[dro wärkln] Buidhauarei im boarischn Raum

S'gebt im boarischn Raum a reiche Tradition in da Buidhauarei. O'gfanga mit stoazeitliche Kuitfigurn wia de Venus vo Willndorf und de Venus vum Goignbeag, gehts iba de Veikawandarungszeid und de Remma eine bis ins Mittloita. Domois san dann de katholischn Kirchn ois Auftraggeba entscheidnd worn. Aus da Spätgotik kennt ma den Meista vo Seeon, der de Madonna vo Seeon gschaffn hod. Bsundas im Barock und im Rokkoko san im boarischn Raum rechte Meistawerk entstandn, und es gebt a Reih vo namhafte Buidhaua, wia de Briada Egid Quirin und Cosmas Damian Asam, da Vitus Kiniger oda da Johann Baptist Straub, de Wessobrunna Familien Feichtmayr, Zimmermann, Schmuzer, und wias olle hoassn.

In de Beagtäla hod se aussadem de Voikskunst stark behaupt. So findt ma ibaroi in d'Oipn a Tradition vo Hoizbuidhauarei. In de Hoizbuidhauaschuin vo Ammagau, Berchtsgon, Minga, Hoistod, Elbigenalp und im Grödnatoi griang heid no junge Leit des Handwerk beibrocht.

[dro wärkln] Matrial

Im Lauf vo da Zeit san in da Buidhauarei de vaschiednstn Matrialien hergnumma worn.

• Horn und Zähn und Knocha vo de Viecha, wo ma gessn oda gjogd hod
• Stoa, dodavu olle meglichn Soatn wia Marmor, Speckstoa, Sandstoa oda Granit
• Hoiz
• Ton, meistns im Feia ghert
• Gips, Beton und Stoaguss
• Metalle wia Bronzn, Eisn, Goid, Suiba, Stahl, Alu
• Kunststoff wia Giassharz, Polyestalaminat, Latex, Silikon
• Wachs
• Eis, Schnee

Und in da zeitgnössischn Buidhauarei werd ja sowieso oiss hergnumma, gfundne Sachan, Schrott, Gwanda, Konsumartikln, oids Essn, wos ma se grad denga ko oda aa ned.

[dro wärkln] B'arbatungsmethodn

Grob ko ma zwischn da additivn und da subtraktivn B'arbatung untascheidn. Bei da additivn werd ebbs aufbaut, bei da subtraktivn werd vo am grossn Stickl Matrial weggnumma, bis des ibrig is, wo da Kinstla wui. Aa do guit, in da neimodernan Kunst is oiss meglich, je ausgfoina, desto erfoigreicha.

[dro wärkln] Additive Methodn

Klassisch Modelliern Drahn vo Ton Giassn

Neiadings aa Schweissn Laminiern Onepappn Nahn oda Stricka Schraubn oda Nogln Sonstwia zsamahoitn oda oafach aso aufanandaschlichtn

[dro wärkln] Subtraktive Methodn

Klassisch Schnitzn Feiln Sagln Meissln Drechsln

Neiadings aa Kettnsagln Sandstrahln Wossaschneidn am Weda aussetzn