Teatri furlan

De Vichipedie, la enciclopedie libare dute in marilenghe.

Il teatri in lenghe furlane al nas avonde tart rispiet aes altris formis artistichis de marilenghe. Dut cas di lunc dal XX secul al si svilupe simpri di plui e al dì di vuê o vin ancje des compagniis profesionistichis.

Indis

1 Storie
2 Bibliografie

[cambie] Storie

[cambie] Il ritart de nassite dal teatri furlan

Lis primis oparis che a podaressin vê une rapresentazion teatrâl a son dal '600 di Ermes di Colorêt, si trate di cualchi dialic tant che Cotrast fra Carneval e Cresime, Di une chitine cul confessôr e Pascute e Macor. Chestis oparis a restarin dome scritis. Par viodi un teatri par furlan si à di spietâ il XIX secul. Lis resons par cui in Friûl nol è nassût prime un teatri par furlan a son diviersis e leadis a motîfs storics e politics. La sotanance sot Vignesie a fasè in mût che il furlan al vignedi pôc doprât dai sorestants. A Udin la prime sale par oparis teatrâls a fò screade nome intal 1601 ma, fûr che par cualchi spetacul par Talian o par Venit a vignive doprade sore dut par bai e musiche.

Intal jenfri che in tantis zonis de Europe, partint de Italie, si difont la Commedia dell'Arte, il Friûl, sotan e emargjinât, al viôt nome i spetacui di cualchi companie venite. No nassin cussì ni mistirants ni autôrs locâi che sedin bogns, magari ancje par talian o par venit, di rapresentà la vite dal timp.

[cambie] La nassite de comedie furlane

Bisugnarà spietà il 1800 e la dominazion austriache par viodi la nassite de comedie in marilenghe. La prime opare dute par furlan e je di Pieri Çorut che intal 1847 al scrîf Il trovatore Antonio Tamburo. E je une comedie cun tocs musicai, dute par furlan che e vierç la strade a dute une schirie di autôrs. Pacifico Valussi, Francesco Leitenburg, Giuseppe Edoardo Lazzerini, Francesco Nascimbeni e Caterina Percoto. Lis storiis a son di solit legris, di ambient contadin e cun finalitât moralistichis. Cul gnûf secul a scomencin a nassi diviersis companiis teatrâls diletantistichis, spes intes parochiis. La filologjiche, nassude tal 1919, a comence a fa dai concors teatrâi. I autôrs de prime part dal secul a son Bruno Pellarini, Giuseppe Marinoni, Ercole Carletti, Arturo Feruglio, Maria Gioitti del Monaco, Anna Fabris, Costantino Smaniotto, Lea D'Orlandi, Pietro Someda de Marco. Lis oparis a continuin, come storiis e ambientazion, intal gust dal '800. In chest mût a plasin une vore a la int ma a restin lontanis dai trois plui modernis che al sta cjapant il teatri european dal timp.

[cambie] Il secont dopovuere

Ancje se a si continue a là daur de tradizion za intai prins agns dal dopovuere si scomencin a viodi i segnai di une schirie di autôrs plui modernis. Se Guido Michelutti al è plui tradizionâl lis oparis di Renato Appi, Alviero Negro e Lelo Cjanton a rivin a tocjâ tematichis mancul sieradis.

[cambie] I Turcs tal Friûl

Intal 1976 a ven publicade I Turcs tal Friûl, opare zovanîl di Pasolini, scrite intal 1944. Chest al è considerât il test plui alt scrit in marilenghe, i soi moments lirics che a ricuardin la tragjedie greche, a mostrin la bravure che Pasolini al mostrarà intai agns seguitîfs. Se di une bande l'opare e reste isolade dal rest de scriture dai tescj furlans la rapresentazion che al fasarà il regjist Elio De Capitani intai agns 90 al tirà su une gnove gjenerazion di teatrants e di spetatôrs furlans.

[cambie] La fin dal XX secul

Sul finì dal secul si viôt une incressite dal teatri furlan cuntun grant numar di compagniis teatrâls gnovis. Dal 1987 l'associazion teatrâl furlane a inmanee un concors leterali bienâl che al devente un stimul par autôrs come Gianni Gregoricchio, Giovanni Morsan, Alberto Luchini, Roberto Ongaro, Luciano Rocco, Paolo Sartori, Carlo Tolazzi, don Pietro Biasatti. Il gnûf mileni si vierç cuntune opare une vore significative su la vite des feminis in Friûl al inizi dal '900; Bigatis di Elio Bartolini e Paolo Patui. In chest periodi a son ancje dute une schirie di traduzions dai grancj autôrs mondiâi tant che Goldoni, Pirandello, Moliere, Cechov e v.i. Cui agns '80 a nassin ancje lis primis companiis teatrâls profesionistichis come il Teatro Incerto (Claudio Moretti, Fabiano Fantini, Elvio Scruzzi). Tal 1988 e nas la Civica accademia d'arte drammatica Nico Pepe, dai soi cors a vegnin fûr i atôrs de Academia de Gli Sventati.

[cambie] Bibliografie

Il teatro in lingua friulana, di Luca Zoratti in Friulano Lingua viva, Udin 2006
Appunti per la storia del teatro friulano, Someda de Marco in Sot la Nape, 1 (1963)
Il teatro in prosa, Nico Pepe in Enciclopedia tematica del Friuli Venezia Giulia