Euro

Da Wikipedia, ła ençiclopedia libara.

L'Euro el xe la moneda comun europea che, contrariamente da quel che se crede de sołito, ła vien doparà 'nte ła Xona de l'Euro xà dal 1° de xenaro del 1999, in sostitusion de łe monede nasionałi. El equivoco el nase dal fato che ancora par tre ani da cheła data łe monede nazsionałi łe ga sevità a zsircołar e esar doparae.

Dal 1° de xenaro del 1999, defati, łe monede nazsionałi łe xe deventae gnente de pi' che sotomultipli de l'Euro dopo che jera sta' fisa' dei tasi de cambio fisi e irevocabiłi verso ła nova moneda ùnica, l'Euro.

I tasi de canbio i jera sta' fisai co un no senplice calcoło, ciapando a riferimento el vałor de ogni moneda rispeto al dołaro USA co ła partesipasion del (ałora) ministro del tesoro tałian Carlo Azeglio Ciampi.

Da chel momento in vanti, tute łe tranxasion finanzsiarie łe xe sta' obligatoriamente in Euro, e i marcai finansiari i ga scumisia' a fisar i presi de borsa e i canbi monedari gavendo come unico riferimento l'Euro. Fin dal 1° xenaro 1999 jera legałe e posibiłe de far ogni tranxasion in Euro (questo no'l escludeva de poder doparar i so sotomultipli nasionałi) e i stati gaveva ła posibiłita' ma no l'obligo de ciapar qualsiasi inisiativa par favorir e pareciar l'entrata in sircołasion de l'Euro concretiza' in forma fisica, prevista par el 1° xenaro 2001.

La pi' conpleta inersia dei vari governi ga fato in maniera che el 1° xenaro del 2001 el publico xe sta' de fato sofegà soto ła sorpresa dei novi schei. Tute łe categorie economeghe organizae, nel fratenpo, łe gaveva avuo modo de pareciarse co' i novi listini e ciapar pa'l coło ła masa disorganizada asołutamente no pronta. L'inpato psicołogico de vedar i presi espresi coi novi vałori ga fasiłità el zogo de chi, metendo presi conpagni de prima (ma in Euro) ga praticamente radopià i listini. Questo spiega tute łe sircołari che jirava favełando de "Grande Opportunita'" oferta da l'Euro, mentre che, a rigor de lojica, ła senplice introdusion de un novo sistema de calcoło gavaria dovuo eser del tuto neutro.

Ad ogni modo, ła nova moneda gà irevocabilmente ligà insieme le economie dei paezi partesipanti. Questo gà significa' na stabiłizasion de l'inflasion e par conseguensa un liveło de costo dei soldi (intarese) mai cusì baso in Italia. In sto modo i finansiamenti ga scumisià a eser particołarmente convegnenti e però l'ineficiensa struturałe del marca' italian in particołare ga in realta' favorìo enti finasiari e società imobiliari che i ga porta' tuto a so profito el vantajo de l'Euro, e par converso a totałe scapito dei singołi consumatori. Insoma, i pi' svantajai i xe comunque stati costreti a pagar el preso pi' grando come che sucede in tuti i grandi stravoldjimenti, co l'agravante de ła conivensa del sitema połitico

Visto da na prospetiva pi' a lungo termine, se trata però de un avenimento epocałe e sensa altro de na grandisima conquista par l'economia nel so' conpleso se se łasa da parte łe distorsion e i trasferimenti de redito da i poareti (dipendenti e pensionai) verso i siori. Sopratuto, ga' liga' de forsa l'economia italiana co łe economie pi' sviłupae obligandone a afrontar novi canpi produtivi e a abandonar łe produsion a alto contenuto de manodopra par deventar, non sensa dołor e no in poco tenpo, na economia de ecełensa e servisi.

Dal punto de vista tecnico de jestion monedaria, ła cołaborazion de łe banche sentrałi co ła BCE in ocaxion de l'introdusion de l'Euro ła xe stada estremamente sodisfasente. Portar in tuti i sportełi bancari na quantità cusì enorme de banconote e monede in tenpo parfeto e smaltir na quantità altretanto strabiłiante de moneda vecia ła xe sta' sensa altro na grandisima prova de eficiensa e organixasion, motivo de vanto par tuta a UE.

[modifica] Aseto Istitusionałe

Le banche nasionałi łe gà conferìo tute łe so sovranità al novo organismo creà par jestir la połitica monedaria comune. Le banche nasionałi, in canpo monetario, łe xe deventae insoma senplicemente agensie periferiche e esecutive e de controło de decision ciapae da ła B.C.E. (Banca Centrale Europea). I governadori de łe diverse banche nasionałi, insieme ai organi comunitari, i partecipa ała jestion de la BCE e ała nomina del Prezidente Ezecutivo, che gode de gran independensa e autonomia.

Conpito istitusionałe de ła BCE xe de garantir e protèjer ła stabiłità e el poder de "aquisto" de l'Euro, e no de altro come par exenpio de łe połitiche macro-economeghe. La BCE ła xe stretamente tegnua a rispetar i so conpiti istitusionałi, che i xe regołai precisamente e sojeti a controło jurisdisionałe da parte de ła Corte de Justisia Europea.