Balthazar
From Wikipedia
- Dit artikel es geschreevn in 't Kortryks, en da zoe best ozô bluuvn.
Balthazar es een Belgisch pop/jazz/rock-groepke me soms een bitje folk.
't Groepke eut de streke van Kortryk es styf joeng. Z'ein wel uldern eign klank die n'bitje doe peizn an andre Belgische groepn lyk dEUS, Absynthe Minded, Zita Swoon en Sioen.
't Zunder die unne stil zigeunerpop noemen. Ze zyn lyk veel echte West-Vlamse artistn: gine kak an ulder gat; ipzettn, speeln en were weg.
Ze zyn begunn in den twièdn elft van 2004 rond Maarten Devoldere.
In 2005 ein Maarten Devoldere, Patricia Vanneste en Jinte Deprez als achttienjoarige snotneuzn de nationoale Kunstbende wedstryd voo jongern gewonn me ulder liedje "Lost and Found".
In april 2005 terte de groep voor den ièste kièr ip in complete bezettienge ip 't podium. In da joar wonn'n ze ôok Westtalent, de rockwedstrijd van de provincie West-Vloandern. Van de achtondred inzendiengen vwoar Humo's rockrally groakn ze, tôpe me 99 andre, deur de preselecties.
In 2006 begostn ze weireldberoemd te koomn in Kortryk en 'n bitje derbeutn: ze keun'n bykanie zière genoeg iptreedn. In Brussle geraktn z'in de finoale van Humo's Rock Rally. Doa liep'n ze ip ulder slissn weg me de KBC-pris van 't publiek (toch nog tiendeusd euro).
In October 2006, ter gelegenheid van 't fièstjoar “Vijf jaar Poppunt” organizeert Poppunt 't project “Raymond en zijn Jonge Helden”. Negen beloftevolle joenge bands ermoaken elk en liedje van Raymond. Balthazar doe mee me "Gelukkig zijn". De hêle show in't Depot in Leuven wird eutgezonden ip Canvas.
Noa 't ende toe van 2006, achter en tzestigtol optredens, besliste Maarten Devoldere van styl te verandren en mêer noa disco house te evolueren. Den drummer en de bassist wirden opzy gezet en de violiste mochtt'eur driengend ommeskooln noa 'n andr instrument.
Ip 18 januoari 2007 werd Balthazar genomineerd vôe de “Zieta Award 2006” van WTV-Focus. Den êenentwintigste januoari 2007 oan ze d'occoazie "Lorraine" te spelen in d'êeste ofleverienge van “Debby & Nancy Happy hour" op Één.
Balthazar begoste ôok mêer en mêer de grenze van de popmezik of te tastn met ne vernieuwdn set.
[bewerk'n] Leedn
- Tot 't ende van 2006:
- Maarten Devoldere (stem, piano) Kortryk
- Patricia Vanneste (stem, viool) Koeigem
- Jinte Deprez (stem, gitaar) Stoasegem
- Joachim Quartier (bas) Ôostrôzebeke
- Koen Verfaillie (drums) Kortryk
- Vanof 2007 zyn de drums en bas vervangen:
- Simon Casier (bas)
- Christophe Claeys (drums)
[bewerk'n] Discografie
- Ogustus 2006: Balthazar (EP), zonder title, in eigen behêer, me volgende liedjes:
- Haven't got you
- Lorraine
- Lost and found
- Don't change the word
- About running
- Never thought occasion
- In her melody
