Zie je van Brugge
From Wikipedia
Zie je van Brugge is e vree gekend liedje over Brugge en de Bruggelingen, da geschreven is deur Willy Lustenhouwer. Da liedje is gebaseerd ip de geschiedenisse van 't Oed-Sint-Jansziekenhuus in Brugge. Doa kwamen de zieken vroeger van overast voor under te laten soigneren. Moa 'snavens moestn ol de poortn van de stad gesloten worden en ton riepn ze tegen de die da noh an 't wachten woaren dat de die die van Brugge zelve waren moesten vanachtern in de reke goan stoan. Vandoage kent ver iedere Bruggeling noh mijenstens 't refring.
[bewerk'n] De tekste
Zie 'j van Brugge, zet je vanachter,
Je moe' van voaren in de reeke nie' gon stoan.
Zie 'j van Brugge, zet je vanachter,
Mé zowwe zot van voaren zoed da' toch nie' goan?
Want ze zeggen damme zot zin,
mo dat is dwoaze proat,
Me zin verdrooid zo zot nie' ofdat onze mutse stoat
Mo zie' van Brugge zet je vanachter,
Je moe' van voaren in de reeke nie' gon stoan.
Zie 'j van Brugge, zet je vanachter,
Of héél d'n boel zoe kennen no d'n knoppen goan.
Ze zeggen toartebakkers, tegen de Meenenoars,
Ze zeggen sulferdoppers, zin Roeselaorenoars,
En schoone vassche ploaten, da ' zin Oostendenoars,
De Blankenbergenoars zin viswuuven en géirenoars.
In Kuurne zitten d' ezels, wien aatter da' gepeisd,
Ze zeggen keunejoengen, tegen de die van Heist,
In Tielt zin 't zunnekloppers, en 'k weten nie' oj 't wit,
Dat 't gunter in Dieksmuudde vul mé beuterboeren zit.
Mo zie 'j van Brugge, zet je vanachter,
Je moe' van voaren in de reeke nie' gon stoan.
Mo zie 'j van Brugge, zet je vanachter,
Mé zowwe zot van voaren zoed da' toch nie' goan?
Want ze zeggen damme zot zin,
mo dat is dwoaze proat,
Me zin verdrooid zo zot nie' ofdat onze mutse stoat
Mo zie' van Brugge zet je vanachter,
Of héél d'n boel zoe kennen no d'n duvel goan.
In Izegem zin 't bustels, in Nieuwpoort kabbeljows,
In Harelbeke droenkoars, in Heule koedde klows.
In Torhout do zin 't slapers, de die zin nooit nie' rap.
In Dentergem do vullen z'hunder buuk me kerrepap.
In Knokke, do zin 't wulloks, Ieper is ' kiendernest,
In Kortriek holve franstjes, ze weten 't oltied best.
In Geluwe zin 't gapers, de grotste da'j kan vien'
En vo de babbeluuttelekkers moe'j in Veurne zin.
Mo zie 'j van Brugge, zet je vanachter,
Je moe' van voaren in de reeke nie' gon stoan.
Mo zie 'j van Brugge, zet je vanachter,
Mé zowwe zot van voaren zoed da' toch nie' goan?
Want ze zeggen damme zot zin,
mo dat is dwoaze proat,
Me zin verdrooid zo zot nie' ofdat onze mutse stoat
Mo zie' van Brugge zet je vanachter,
Je moe' van voaren in de reeke nie' gon stoan.
Zie 'j van Brugge, zet je vanachter, Of héél d'n boel zoe kennen no d'n duvel goan.
